1. 34 PALAN NGIBUN ANAK BA ENDUR GAWA DEKA DITUMBUHKA
Penyampau 34 buah palan ngibun nembiak ba endur gawa di Sarawak deka ditumbuhka Perintah Sarawak enggau Perintah Besai ujung taun tu ila.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato ‘Sri Fatimah Abdullah madahka naka diatu Sarawak semina ngembuan 10 iti buah palan nyeridi anak mit tauka taska direjista ba endur gawa lalu 14 buah palan taska ti bukai agi dalam proses direjista.
Naka diatu ku iya, empat buah palan nyeridi anak mit nya udah ditubuhka ianya di Opis Pengintu Pengelantang Pendiau Mensia Mayuh (JKM) ti deka ngemunka operasyen kena bulan Februari tu ila, Universiti Teknologi Mara (UiTM), Jil enggau Sepital Sibu.
Nangkanka nya dalam Agih Belanja Nengeri 2020 mega ku iya, Perintah Nengeri udah meri ungkup penyampau RM1 juta bagi numbuhka 4 nyentuk 5 palan ngibun anak mit ba endur gawa.
Nambahka nya iya madahka opis menteri iya deka mansik baru peminta apai indai ti gawa , bekaul enggau pengawa nyendiaka servis ngibun nya lepas jam besekula.
2. PROJEK RTP PATUT DISELITI SERETA TEMBU NITIHKA ATUR TI UDAH DITETAPKA
Opis Pelilih Menua Tanjung Manis ngembuan juluk deka nyeleti tetiap iti projek RTP ti diatur nitih spesifikasyen lalu deka nyeleti ngambika projek nya tembu nitihka ripih ti udah ditetapka.
Ku Pemesai Pelilih Menua Mukah ADO Mohd Amirul Abdulah, iya deka tetiap bengkah ejensi pengatur projek nya lebih sikar sereta tegas enggau kunteriktor ti udah mujur bulih projek nya.
Iya mansutka jaku nya lebuh ti betuaika aum pematau RTP bagi pelilih menua Tanjung Manis di Opis JKR Bagian Mukah kemari.
3. PROJEK NGEMESAI JALAI ULIH MUTAR PENANGGUL JALAI SEKUT DI MIRI
Projek ngemesai Jalai Datuk Muip Miri ti nelan kus penyampau RM233,800 udah ulih mutarka penanggul jalai sekut kelebih agi maya jam mensia mayuh pulai gawa.
Menteri Muda Dagang Temuai, Seni, enggau Main Asal, Datuk Sebastian Ting madahka, projek ngemesai jalai ba sepemanjai 225 meter nya mega nyendiaka jalai lorong bagi orang ti bejalai kaki.
Kaban Kunsil Nengeri Piasau mega madahka pekara tu ketegal jalai lama ti seruran sekut, ketebal agi muak ke pagi enggau ngalih hari laban jalai nya suah ditengah bala apai indai nganjung anak sida ke sekula.
Sumber dari : TV Sarawak